Resultados de la busqueda para Juan Luis Azkarate.

Ondo antolatutako ekitaldi batek ematen diguna

eli-pinedo-berabera

Ondo antolatutako ekitaldi batek zenbait komunikazio eta marka helburu betetzen lagunduko digu:

  • Hainbat marka elkarlanean arituko dira: guztiak indarturik irtengo dira.
  • Hedapena: komunikazio tradizionala eta marketing digitala erabiliz, ekintzaren kontakizuna lau haizetara zabaltzen lagunduko digu.
  • Interes fokuak biderkatuko dira.
  • Gogorapena eta sentsazioak denboran luzatuko dira.
  • Parte-hartzaileak gure preskriptoreak bilakatuko dira.

Joan den ostegunean, Mondragon Unibertsitateko ikasleen Project Based Learning metodologiaren bitarteko ikasketa eredu praktikoa (egiten ikasi) ezagutaraztea helburu, PBL Day ekitaldia izan zen Hernaniko Orona Ideo campusean.

Unibertsitateak alde akademikoaren antolakuntza bere gain hartu zuen, proiektuen lehiaketaren eta workshop-en bitartez, eta guk, jende gaztea erakartzeaz gain oihartzun zabalago bat lortzeko asmotan, lau hitzaldi antolatu genituen. Halaber, ekitaldia zabaltzerakoan, Euskadi Gazteako Dida saioaren konplizitatea gureganatu genuen. Dida taldekoek osteguneko saioa Orona Ideotik igorri zuten zuzenean, elkarrizketak eta zozketak tartekatuz. Aurreko egunetan ere, eta apur bat giroa berotzeko, PBL Day-ri eta Orona Ideoan ematen diren ingeniaritza graduei buruzko hainbat aipamen egin zituzten.

Hitzaldiak emateko,  honako pertsona  hauen partaidetza  lortu genuen: Eli  Pineko eta Montse  Puche, Bera Bera  saskibaloi taldeko  jokalari eta  entrenatzailea,  hurrenez hurren; Joseina  Etxeberria, Gazteako esataria; Julen  Hernandez youtuberra eta Gaizka  Garitano, Eibar eta Valladolid futbol taldeetako entrenatzaile ohia. Lau  hitzaldiak oso interesgarriak izan ziren,  eta hizlarien jarrera txalotzeko modukoa  (eskerrik asko bostoi!). Euren hitzaldiekin gainera,  aretoa betetzea edo ia betetzea lortu  zuten.

eli-pinedo Eli Pinedok eta Montse Puchek, kirolaz  haratago, lidergoa eta talde-lanaz jardun  zuten, bai Bera Bera taldean, bai  Espainiako selekzioan, non rolak eta  egoerak oso bestelakoak diren. Denboraren poderioz lidergoa  nola aldatu den ere komentatu zuten, Montse Puche jokatzen hasi zenean entrenatzaileen estiloa oso diktatzailea baitzen.

Joseina Etxeberriak azaldu zuen nola gauzatzen duten teknikoki Gaztea Saioa, hainbat trikimailu erakutsiz; musikaren aukeraketaz ere jardun zuen, eta onartu radio-formula kontzeptura jotzen dutela ahalik eta publiko gazte gehien erakartze aldera baina, alde horretatik, euskarazko saio batekin Los 40 baino publiko gehiago izateak kristoren lorpena dela adierazi zuen.
  joseina-etxeberria

Julen Hernandez donostiarra youtuber profesionala da eta ‘Hola Julen’ 89.000 harpidedun dituen kanala kudeatzen du. Azaldu zuen zeintzuk diren lanbide honen diru-iturriak eta eman beharreko pausuak bideoak monetizatzeko. Horretan, publizitate zuzenaz gain, network-en lana oso garrantzitsua da, enpresa hauek jartzen baitituzte harremanetan youtuberrak eta markak, youtuberrak bere kanalean marka horiekin lotutako ekintzak buru ditzan. Adibidez, Julenek erakutsi zigun ron marka ezagun batek otsailean antolaturiko Punta Canan eginiko youtuber eta blogerren topaketaren bideoa.

Azkenik, Gaizka Garitanoren txanda heldu zen. Kasu honetan, elkarrizketa formatuko jarduna izan zen, Xabi Igoa gure lankideak kazetariaren papera bete zuelarik.

Garitanok umorez zipriztinduko bere jardunean, kirola eta ikasketak nola uztartu, lidergoa, bizitzan berak duen jarrera beti positiboa eta horrelako gaiak ederki jorratu zituen, bere futbol ibilbidean izandako hainbat pasadizoekin tartekatuz.

Una foto publicada por Julen Hernandez (@holajulen) el

Sare Sozialetan publizitatea eta euskara:
non-matching language

aurpegiaksocialmedia

Publizitatea gaztelaniaz zein euskaraz egiten dugunontzat batzuetan ez da batere erraza bata edo bestearen aldeko hautua egitea. Bakoitzak bere alde onak eta txarrak ditu, jakina. Gaztelania erabilita jende gehiagori helduko zaio mezua; baina euskaraz eginez gero atxikimendu handiagoa lortuko dugu, engagement famatua, euskarak gaur egun interneten duen presentzia aktiboari esker, eta jende askok kidetasun-harreman estua sentitzen duelako euskararekiko.

Baina zer gertatzen da gure esku ez dauden beste faktore batzuk jokoan sartzen direnean? Beste modu batean esanda, eta post honi dagokion esparruari helduta: sare sozialei erreparatuz gero, euskara hizkuntza normalizatua ote da? Ez, inondik inora.

Hiru sare sozialetan, Facebook, Twitter eta Linkedinen urte honetan zehar, gure agentzian izandako esperientziaren bitartez, kontatuko dizuegu zer hizkuntza politika dituzten sare sozial hauek publizitateari dagokionez:

Facebook: euskara onartu

Inoiz ez digute inongo trabarik jarri publizitatea euskaraz egiteko, eta normal normal erabiltzen dugu euskara sare honetako iragarkietan, gaztelaniaz pareko. Duela gutxi, Facebooken plataforma erabiliz Instagramerako iragarkiak ere egin daitezke eta, hor ere, sartu izan dugu noizbait euskara.

Twitter: Houston, we have a problem

Sare sozial honetan buruhauste galantak izan ditugu, euskara dela-eta, nahiz eta beti saiatu izan diren arazoak konpontzen.

  • Behin baino gehiagotan geldiarazi egin dizkigute kanpainak euskaraz zeudelako. Twitterrera jo genuen azalpen baten bila, eta Bartzelonako teknikari batek maiatzean esan zigun Twitterrek ez zituela euskarazko txioak identifikatzen (euskararena ez da kasu bakarra) eta horregatik, mezuen esanahia ulertu ezean, automatikoki geldiarazten zituela. Hala ere, lanean ari zirela hutsune hau konpontzeko, nahiz eta berak ez jakin noizko. Bitartean, kanpaina bat geldiarazten ziguten bakoitzean abisatzeko, eta berak ipiniko zuela berriro martxan. Bere hitza bete zuen.

 

  • Ekainean PuntuEUS Fundaziokoak Twitterreko ordezkariekin bildu ziren eta bi erabakiren berri eman zen bilera horren ostean: Twiterren .eus domeinuaren jauzia eta Twitterrek euskaraz idatzitako txioak identifikatuko dituela laster.

 

  • Euskaraz egin ditugun azkenengo kanpainak ez dizkigute geldiarazi. Baliteke izatea plataformak ez duelako ezer “arrarorik” antzeman, inor ez delako konturatu euskaraz zeudenik, alegia. Twitterrek, dena dela, oraindik ez du jakinarazi euskara hizkuntza identifikatzen duenik.

linkedin mezua 10nov copia copia

Linkedin: euskararik ez

Gaur egun ezin da egin publizitaterik euskaraz Linkedinen, ez duelako hizkuntza identifikatzen. Honen gainean, joan zen hilean, azaroan, jasotako mezua.

 

“Bideo eta irudia dira nagusi gaur egun Marketing Digitalean”

neka2

Nekane Zapatak Marketing Digitaleko Masterreko praktikaldiak gurean egin zituen, AZK agentzian, zortzi hilabetez. Ondoren, lan-taldean sartu da. Ezagutu dezagun nolakoa den Nekane eta nola ikusten dituen AZK eta Marketing Digitaleko egungo egoera.

– Konta iezaguzu, apur bat, zein den Nekane Zapata:

22 urte dauzkat eta Bergarakoa naiz. Bilbon ikasi nuen Marketineko gradua, UPV/EHU-n; izan ere, lehenengo promozioa gurea izan zen. Hau bukatu ondoren, ikasketekin jarraitzea pentsatu nuen eta master bat egitea aproposena iruditu zitzaidanez, Marketing Digitaleko Masterra egin dut aurten Mondragon Unibertsitateko Enpresagintza Fakultatean, Oñatin.
Nire zaletasunen artean, esan dezaket musika entzutea dela nire egunerokoan falta ezin den gauza bakarra; honekin batera, irakurtzea ere asko atsegin dut. Gainera, edozein moduko liburuak irakurtzen ditut, ez dut ez idazle ez gai gustukoen; arreta pizten didatenak irakurtzen ditut. Beste alde batetik, izugarri gustatzen zait hondartza, bai udan eta bai neguan, eta surfa egiten dutenak ikustea. Nik ez dut surfik egiten, baina egiten dutenek benetan harrituta uzten naute.

_ Marketing Digitaleko unibertsitate masterra egin zenuen Mondragon Unibertsitatean. Zer moduzko esperientzia izan zen?, gomendatuko zenuke master hau?

Masterra hasi baino lehenago itxaropen handiak nituen; izan ere, Bilbon egon nintzen Master eta Postgraduen azoka batean oso ondo azaldu ziguten dena eta bertan jakin nuen horrelako zerbait egin nahi nuela. Esperientzia oso polita izan da, klasean hain giro ona izateak ere lagundu du, baina horretaz gaindi, irakasleak eta hizlariak oso ona izan dira eta beraien irakaskuntzak oso lagungarriak izan dira, bai klaseetan bai oraingo lanean.
Masterraren alde positiboenetako bat bere praktikotasuna da eta, honi esker, azkar ikasten da, “lear by doing” delako metodologia guztiz aproposa delako. Beste alde batetik, praktikak egiteko programa oso ona da eta hainbat enpresen artean aukeratu ahal izaten da. Beraz, unibertsitatea bukatzen dutenei gomendatzen diet master hau.

– Kontatu nolakoak izan ziren AZK-n egindako Master amaierako proiektua: zein izan zen zure eginkizuna eta zenbat denbora eman zenuen bertan?

AZKn praktikak hasi nintzenetik sare sozialen eta online munduan sakonago sartu nintzen. Laburbilduz, AZK-k dituen bezeroen sare sozialak eta web orriak ezagutzen eta hauek edukiez elikatzen jardun nuen. Hasieran sei hilabeteko praktiketako egonaldia zen, ondoren udako hilabeteetarako luzatu zen praktiketako kontratu hori eta irailaren 1etik hemen ari naiz lanean.

– Praktikak bukatu ondoren, zein da orain zure eginkizuna?
Nire eginkizuna orain ildo berdinetik doa baina erantzukizun handiagoarekin; izan ere, proiektu batzuk nire ardurapean daude.

_ Nolakoa da AZK komunikazio enpresa bezala, zuk espero zenuen modukoa da edo oso bestelakoa?, zerbaitek harritu zaitu bereziki?
Enpresa moduan AZK-ak modu positibo batean harritu ninduen, izan ere, astero astero bilerak daude non proiektuen berritasunak komunean jartzen diren eta aste horretako lana antolatzen den. Ez nuen espero barne-komunikazioa hain ondo antolatuta egongo zenik eta, nire ustez, oso era egokia da. Beste alde batetik, lan egiteko giro oso ona dago.

_ Marketing Digital eta Enpresen Komunikazioaren inguruan gogoeta txiki bat egiteko eskatuko dizut: zeintzuk dira oraingo tendentziak?, gauzak asko aldatu dira azken urteetan komunikazioari dagokionez, asko aldatuko dira hemendik aurrera ere?

Online munduari begiratzen badiogu, oraingo errealitatea bideo eta irudietan zentratzen da; izan ere, sare sozial gehienetan eta webguneetan arrakasta izateko irudi eta bideoen erabilera egoki bat egin behar da. Izan ere, orain da bai Instagram, bai Flickr eta honelakoen gorengo unea.
Erabiltzailea ere indar bisualez mugitzen da eta gero eta nazkatuago dago testu luzeez; beraz, enpresak egokitzen ari dira tendentzia horretara.
Beste alde batetik, gaur egun garrantzitsua den eta gero eta garrantzitsuagoa izango den gailua, telefono mugikorra da. Momentu oro konektaturik egotea behar bat bihurtu da, eta gero eta aplikazio gehiago sortzen dira hauen inguruan. Zerbitzu gehienak beraien mugikorrerako aplikazioak sortzen ari dira; osasunaren arloan, adibidez, aplikazio asko daude zure egunerokoan erabiltzeko; hala nola, loaldiak kontrolatzen dituzten aplikazioak, bizi-konstanteak kontrolatzen dituztenak… Eta denborak aurrera egin ahala gero eta gehiago izango dira, aurrerapen asko gertatzen ari dira eta sektore honetan.

Amsterdameko lotsabakoak

shutterstock_229711798

Hegazkinera igotzen, ardo garesti bat dastatzen modako jatetxe batean edo selfiea egiten kontzertuko lehen lerrotik. Zenbat bider igo ditugu horrelako egoeren testigantzak Facebook edo Instagramera. Twitterren, berriz, telebistako mahai-inguruan adierazitako iritzi politiko jakin baten alde edo kontra lerrotu gara, sutsuki. Lehen esfera pribaturako gordetzen zirenak orain lau haizetara zabaltzen ditugu, gehienetan gure buruaren irudi idealizatu bat eman guran, eta askotan konturatu barik han esandakoa betiko geldituko dela idatzirik.

Sare sozialen bidez nahita ematen ditugun informazio honetaz gain, badaude beste datu asko ia konturatu barik ematen ditugunak eta, nahiz eta jakin ez, egunen batean gure kontsumitzaile, boto-emaile edo hiritar profila osatzeko erabiliko direnak. Hor daude Interneteko cookiak, gure eguneroko nabigazioaren urratsak gure interes, gustu eta zaletasunak deskodetu eta informazio-datu zehatzak bihurtzen dituztenak. Bankuko edo supermerkatuen fidelizazio txartelekin egiten ditugun erosketak ere, besteak beste, guri buruzko arrastoa lagatzen dute. Horri guztiorri Big Data deitzen zaio eta esaten da etorkizun hurbilean, sakabanaturik dauden arrasto horiek datu zehatzetan interpretatzeko formula “magikoak” guztiz garatzen direnean, urregorria besteko balioa izango duela.

Guk geuk nahita edo konturatu barik zabaldu dugun informazio horretaz guztiaz baliatuta, saldu ahal izango dizkigute guri propio diseinaturiko oporrak, bizitza asegurua edo automobila, kasu. Hauteskunde garaian ere egunen batean ingeniariak eta matematikariak ibiliko dira datu pertsonalak kudeatzen, banakakoak zein taldeetakoak, datu base erraldoiak erabilita¬, boto emaileak alderdi zehatz baten edo bestearen alde erakarri guran.

Sare sozialen, plastizkozko diruaren eta Big Dataren sasoi honetan pribatutasunak berea egin du, eta intimitatea beste garai bateko kontua da.

Gogoratzen dut behin, milurteko hasieran, Amsterdamen egon nintzenekoa, orduan han bizi zen lagun baten etxebizitzan. Hiri kosmopolita hartan bazegoen gauza bat pila bat harritzen gintuena: etxeetan ez ziren apenas gortinarik erabiltzen, eta guztion begi-bistan gelditzen zen, lotsagabeki, etxebizitza haien egongela zein sukaldeetan gertatzen zen guzti -guztia. Nahiz eta orduan ez jabetu, XXI. mende hasierako gizartearen metafora bat genuen aurrez-aurre.

Artikulu hau Puntua aldizkarian argitaratu zen 2015eko uztailaren 3an.

Sare sozialen arrisku isila

bufete1

Negozio batzuetan publizitatea egitea kontu latza izaten da. Heriotza gertutik ikutzen dutenetan, kasu, irudimena eta sormena kiloka behar dira gustu txarrean ez erortzeko. Eta gaur egun, gainera, hanka sartzeak larrutik ordaintzen dira, are gehiago sare sozialen bat-bateko efektu biderkatzailea kontuan hartuz gero. Minutu batean, zerutik infernura.

Galdetu, bestela, zer gertatu zitzaion Bufete Rojas abokatuen enpresa katalanari Lufthansako kopilotoak bereak egin eta gutxira. ‘Testamentos Inteligentes. Herencias Felices” (“Zentzuzko Testamentuak. Zorioneko Herentziak”) da bufete honen leloa eta, bi ideia (ekintza + saria) hauetan oinarriturik, eraikitzen dute euren diskurtso komunikatibo osoa. Argi dago zer saltzen duten. Marketinaren ikuspuntutik, oso estrategia ona.     

Baina, negozio hauetan, kontu handiz ibili beharra dago non, noiz eta nola erabiltzen den artilleria komunikatiboa. Hala ere, Bufete Rojaseko community managerrari ideia ona iruditu zitzaion Lufthansako ezbeharraz baliatzea publizitate apur bat egiteko sare sozialetan. Horrelako gertaera beltz baten tenorean, Alpeetatik zetozen albiste beldurgarrien artean, zer hobeto jendeari honako mezu hau Facebook eta Twitterretik helaraztea baino:  Akats handia da istripuak beti beste batzuei gertatzen zaiela pentsatzea. Edozeini gerta dakioke. Ez ahaztu, are gehiago ekonomikoki zure menpeko pertsonak baldin badituzu. Zentzuzko Testamentuak. Zorioneko Herentziak”.

     

Berehala Twitterra sutan jarri zen eta txioa trending topic bihurtu bai, baina Bufete Rojasek bilatzen zuen kontrako norabidean. 1.200 mezutik gora jaso zituen denbora gutxian, zein baino zein maitagarriago; adibidez, enpresaren logotipoan putre baten irudia jartzeko gonbidapena luzatu zion bufetearen jarraitzaile sutsu batek; eta hainbat aipamen kritiko prentsan. Bat-batean lurretik desagertu nahi zuen Bufeteak.

Sare sozialetan borontate ona ez da nahikoa, are gehiago enpresa baten izenean aritzen garenean. Aurreikusi behar da mezu jakin bat, testuinguru jakin batean, eragin ditzakeen erreakzioak, minutu gutxitan negozio baten erreputazioa pikutara bidali daitekeelako, deskuidatuz gero.

Bufete Rojas egun desagertuta dago Twitterretik; hori bai, behin betiko agurtu baino lehen, bere nahi gabeko testamentua utzi zigun idatzirik, 140 karakterretan. 

     

Post hau Puntua aldizkarian argitaratu zen 2015eko apirilaren 24an.

1...34567...1020...20