Komunikazioa, enpresetan ere giltzarri

Komunikazioa-azk

Dagoeneko eztabaidaezina da komunikazioa giltzarrietako bat dela enpresa-arrakastaren baitan. Arian-arian enpresa zuzendaritza-eta kudeaketa-taldeak ohartu dira korporazioaren martxan ona bermatzeko zein ezarritako helburuak erdiesteko, funtsezkoa dela komunikazio-sareak bermatzea eta aldez aurretik estrategikoki planifikatzea. Alegia, produktu eta zerbitzuen kalitateaz harago begiratu beharra dago, erakundearen norabidea edozein delarik ere.

Hori horrela, enpresaren antolaketa-kultura bateratzen eta ezagutzen ahalegintzeak eta bertako langileek egoki lan egin dezaten beharrezkoak diren baliabideak eskaintzeak behar lukete izan, besteak beste, goi karguen lehentasuna eta jomuga. Hartara, enpresa ororen eginkizuna izango da barruan gertatzen dena aztertzea, horretarako aldizkako behaketak eginez langileen lan-jardunean zein jarreran, hutsegiteak eta ondo egindakoak dignostikatzea helburu, horrela baino ez baitago aurre egiteko aukera. Are gehiago, atzeraldi, zailtasun eta krisialdietan, koronabirusaren pandemian kasu.

Beraz, bizirik jarraitu nahi duen enpresak ezinbestean garatu beharko du neurrira diseinatutako komunikazio-plan estrategikoa, zeinak diagnosia izango duen, helburuak zehaztuko dituen, barne zein kanpo ekintzak planifikatuko dituen, materialak sortuko dituen, egutegia zehaztuko duen eta aldizkako jarraipena izango duen. Izan ere, asko dira estrategikoki diseinatutako komunikazio-planak enpresari dakarzkion onurak. Batetik, langileen artean balio korporatiboak sustatzen ditu; bestetik, helburuak zehaztea ahalbidetzen du; horrekin batera, prezipitazioa saihesten du, alegia, erabakiak oinarri sendo batekin eraikitzen dira; ahaztu gabe lehentasunak hautatzeko eta inbertsioak zehazteko baliabide ezin hobea dela.

Esandakoak esanda, argi geratzen da komunikazioa lan-eremutzat hartu behar dela ezinbestean. Azken urteotako datuak jaso eta haietan oinarrituta esan daiteke lan-esparru berritzaile, erabilgarri eta interesgarria dagoela arlo honetan. AZKn argi daukagu komunikazio korporazional estrategikoa ez dela moda kontua edo joera iragankorra, baizik eta zinez egiaztatutako egungo premia.

Denbora zor diogu

sormena

Atzera kontaketa konstantean bizi gara. Emaitza sortzaile baterako, ordea, denbora funtsezkoa da. Ez da kasualitatea izango sormenak bidea egitea denborak mugatzen ez gaituenean…

Sormena.

  1. iz. Ahalmen sortzailea, errealitatean ez dagoena irudimen nahiz gogamenez sortzeko eta errealitatean gauzatu edo kreatzeko balio duena.

Sormenak ez daki denboraz, ez daki ordularien orratzez. Entrega epeez. Ez da geratzeko etortzen, badator eta badoa. Mareen gisan, gora eta behera ibiltzen da. Eta, olatua hartzen baduzu, sortzeko zorteko izango zara; bestela, aparra bezala desegingo zara.

Denbora.

  1. iz. Gauzak gertatzen eta izakiak aldatzen diren bitarte mugagabea; delako bitarte horren zati mugatua.

Denborak ordea, aski ongi ezagutzen ditu ordularien tik-tak hotsak. Taupadatzat ditu. Denborak hasiera eta bukaera du, markatu egiten du, mugak jarri.

Sormenak eta denborak bat egiten duten unean

Sormenerako denbora funtsezkoa dela esateko testu hau ere atzera kontaketa batean dago idatzita. Erlojuen tik-tak hotsen presioan. Hots bat gehiago, segundu bat gutxiago. Horretan ari gara, denboraren garrantziaz hitz egiten, denborarik ez dugunean. Baina horrela bizi gara, sormen preziatuari preziorik jarri gabe. Minutu bateko kulturan, atzorako ziren entregetan: sormena eskatzen, baina denbora ezin eskaintzen.

Gure esparrua komunikazio estrategikoa eta markagintza dira. Sormena da gure lanabesa. Helburuak lortzeko ideiak gorpuzten aritzen gara, forma ematen: hitzetan, koloreetan, doinuetan, ehunduretan, irudietan…  Eta horiek, ordena logiko eta eraginkorrean zabaltzeko planak diseinatzen; noiz, nondik eta nola komunikatuko ditugun zehazten. 

Puzzle baten antzera, pieza guztiak ondo batzen aritzen gara, elkar hartuta estrategia indartzeko. Helburua lortzeko. Eragiteko.

Hori da gure eguneroko ogia. Eta okinak irina lez, behar dugu guk sormena. Sormena denbora da, eta denborak prezio bat du.  AZKn kontziente gara horretaz, eta egoera hori irauli nahian, gero eta garrantzia handiagoa ematen diogu sormenari. Muga guztien gainetik.

 

Edukien sorkuntzan eta estrategian arituko den lankide berri baten bila ari gara

11022021-_R0A4771

LAN ESKAINTZA. Edukien sorkuntza eta estrategia

Deialdiaren oinarriak

FUNTZIO NAGUSIAK

  • Ikus-entzunezko edukien produkzioa eta koordinazioa
  • Marken lanketa, eraikuntza, estrategia eta kudeaketa
  • Komunikazio planen diseinua
  • Kanpainen ideiagintza eta kontzeptualizazioa
  • Online zein offline edukien diseinua ta planifikazioa
  • Gidoigintza eta testuen idazketa

OINARRIZKO ESKAKIZUNAK

  • Ekintzailea eta sortzailea izatea
  • Taldean lan egiteko gaitasuna izatea
  • Komunikaqzioari lotutako ikasketak izatea
  • Komunikazioaren alorrean lan esperientzia izatea
  • Programa hauek ezagutzea: Premiere/Final Cut, Illustrator, InDesign, Photoshop, Lightroom

BALORATUKO DA

  • Markagintzan zein komunikazio korporatiboan formakuntza edota esperientzia izatea
  • Euskarazko C2 ziurtagiria izatea

LAN BALDINTZAK

  • 40 ordu astean
  • Soldata duina
  • Lanean hasteko data: abuztuak 24

HAUTAKETA PROZESUA

  • Ekainak 15: Lan deialdiaren irekiera
  • Ekainak 29: Izena emateko (curriculumak, portfolioak eta aurkezpen gutunak bidaltzeko) azken eguna
  • Ekainak 30: Jasotako eskaeren balorazioa
  • Uztailak 2 eta 5: Hautatutakoen elkarrizketak
  • Uztailak 6: Lanpostuaren ebazpena
  • Abuztuak 24: Kontratatutako langilearen lehen lan eguna

Ekaitz Zilarmendi: “Ikus-entzunezkoen aldeko apustua egitearen garrantzia inoiz baino agerikoagoa da”

Ekaitz_Zilarmendi

Teknologia, sormena, gaitasuna eta denbora. Lehentasunen arabera, zein hurrenkeratan antolatuko zenituzke?

Laurak lotuta daude eta batak bestera eramaten zaitu. Teknologia garrantzitsua da, baina erabiltzen ikasi behar da, eta lan prozesua aurrera eramateko ezinbestekoa da denbora. Sormena eta gaitasuna ere eskutik helduta doaz; norberak bere buruarengan konfiantza sentitu ahala, profesional bezala, gero eta gaituago sentitzen zara eta, era berean, mugak eraitsi eta sormen prozesu bat zabaltzeko aukera ematen diozu zeure buruari. Hori teknologiarekin eta denborarekin lotzen da. Batak bestea ekartzen du. Guztien arteko dantza bat da.

Garai konplexuak bizi ditugu eta, inoiz baino gehiago, irudiaren aroan murgilduta gaude. Argazkilaritzak zein ekarpen egin dezake testuinguru honetan?

Momenturik latzenetan, argazkilaritzak paper garrantzitsua jokatzen du. Pandemia garaian eta konfinamendu garaian, argazkilari askok erakutsi digute jendea bizitzen ari den errealitatea. Hedabide nagusietan agertu ez diren leku eta testigantza ikusezinak jaso ditugu fotokazetaritzaren bidez. Emilio Morenatti argazkilariak, adibidez, irudien bidez islatu du Gabonetan bakarrik egon diren pertsona helduek nola bizitu dituzten une horiek, edo Covid-19arekin kutsatu diren pertsonen egoera oso gordinak ezagutu ditugu Ur Handitanen.

Lan munduari dagokionean, ikus-entzunezkoen aldeko apustua egitearen garrantzia inoiz baino agerikoagoa dela esango nuke; estrategikoa da enpresek euren marken posizionamendua eta komunikazioa indartzeko. Krisiak kolpatu dituen sektore, enpresa edota taldeek iruditeria bat sortzeko eta beraien egoera hobetzeko tresna bat da argazkilaritza.

Hamaika ertz ukitu dituzu zure ibilbide profesionalean zehar. Zeinek ukitu zaitu zu gehien?

Guztiek ukitzen naute. Lan batzuk motibagarriagoak dira besteak baino, baina beti naiz gai esperientzia guztiei alde positiboa ikusteko. Proiektu guztietan ikasten dut zerbait eta profesional bezala hazten laguntzen didate denek. Gogora datozkit ur azpian eginiko argazki saioak, edo castell baten barrura sartu eta izerdi usain hori eta arnas estu horiek bizitu nituen eguna…

Marka baten eraikuntzan, irudiek zein paper jokatzen dute?

Irudiek asko hitz egiten dute. Irudiek erakartzen dute hartzaileen atentzioa. Arrakasta eta eraginkortasuna bilatzeko, gakoa da sortzeko prozesuan aintzat izatea irudiaren funtsa, zertarako eta non erabiliko den, etab. Oinarrizko informazio horrek guztiak laguntzen du irudia ondo kokatzen.

Zein da argazki on baten gakoa?

Argazkiak zerbait sortaraztea irudia ikusten duenarengan. Ez du zertan zerbait emozionala izan. Zerbait estetikoa izan daiteke, edo ekintza bat eragiten duena. Nire kasuan, argi perfektua lortzen dudanean sentitzen dut argazki on bat atera dudala; klik egiten dudan momentuan badakit hori, motibazio berezi bat sentitzen dudalako. Beste klik batzuk, klik normalak dira. Inplikazio emozionalak ere asko eragiten dit pertzepzio horretan. Era berean, norengan eragin nahi den jakitea ere garrantzitsua da: enpresa baten bezero potentzialarengan, ezkontza bateko bikotearengan, senide batengan…

Zein da zure lan egiteko modua?

Argazkilari bezala, bi modu daude lan egiteko; bata da irudikatzera joatea eta topera horretarako eszenak sortzea; eta eszena sortzerako momentuan sartzea sartu beharreko elementu guztiak —argiztapena landu etab—. Alegia, amaierako emaitza ona izan dadin beharrezko erabakiak hartzea. Eta beste mota bateko argazkiak lantzen dira irudi bakar bat edo bi pentsatuagoak sortzera goazenean. Lan egiteko bi modu horiek oso interesgarriak dira. Batean azkartasunez emaitza onak lortzen dira, eta aurretik egindako lanketa baten ondoren emaitza interesgarriak erdietsi. Bigarrenak, aldiz, lan sakon bat egiteko aukera eskaintzen du, errotik lantzekoa.

Askotan bakarrik irudikatzen zaitugu, kamera atzean. Bakarkakoa bidea ez da izango, baina. Zein dituzu bidelagun?

Nahiz eta ni freelance-a izan, AZKrentzako lan egiten dudan aldiro, AZK-ko kide sentitzen naiz. Pertenentzia bat permititzen diot nire buruari taldekide sentitzeko, guztion artean ateratzen dugulako aurrera lana. Egoera berri bati aurre egitera goazenean, argazkilari profesionala izateaz gain, pertsona ere banaiz. Une horietan konfiantza baldin badago, lasaiago joaten naiz, taldekide sentitzen naizen momentutik babesa sentitzen dudalako edozein lan aurrera ateratzeko. AZK-ko pertsonekin asko ikasi dut; baita keinu batekin bezeroari komunikatzen ere. Bezeroa entzutearen garrantzia oso presente izan ohi dut beti.

Ekaitz_Zilarmendi

 

Martxoak 8, berdinetik berdinera

martxoak_8

 

Martxoaren 8a. Efemeride den eguna mugarri ere bihurtu da isilpekoak ozen ohiukatzeko eta  hainbat markek betaurreko moreetatik begiratzen dutela esateko.

Alta, esatea eta komunikatzea bi gauza oso ezberdin dira. Esan daitezke gezurrak eta komunikatu egiak. Horregatik, markagintzan aritzen garenontzat premisa bat da, esaten dugunarekin komunikatzea iristeko, gure balioei errotuta eta lerrotuta egotea. Hots, garen hori esatea, ez izan nahi duguna; eta izan nahi dugun hori izateko, bidea egitea.

Bidelagunen balioak ezagutzea eta horiek estrategikoki komunikatzean datza gure jarduna. Baina bidelagunak diren heinean, bidea elkarrekin egin behar badugu, funtsezkoa da balioetan bat egitea.

Eta gure balioen artean, noski, ikuspegi feminista edonoiz eta edonon txertatzea dago. Zeharkatzen gaituen gaia da, beraz, zeharkakotasunez lantzen dugu. Betaurreko moreak jantzita ekiten diogu proiektu bakoitzari, eta etengabe gabiltza betaurreko moreak graduatzeko lanean, nola gureak, hala gure bidelagunenak.

Berdinetik berdinera aritzea dugu gustoko, eskutik heldu eta bidea elkarrekin egitea. Eta horretarako, parez pare aritzeko, berdintasuna funtsezkoa da.

Hitzez ari gara, baina esaten baino, egiten eta egoten komunikatu behar dugu begirada hori. Mundua ikuspuntu horretatik ikusi dezagun!

 

martxoak_8