Komunikazio digitala bilaketaren emaitza.

Kale publizitatea, iragana ala etorkizuna?

kale publizitatea

6 ordu eta 54 minutu. Hori da 2020an mundu mailan erabiltzaile bakoitzak Interneten pasa duen eguneko bataz besteko denbora, We Are Social agentziak egindako ikerketa baten arabera. Euskal Herriaren kasuan datu hori zehazki zein zifratan dagoen jakin gabe ere, agerikoa da gurean ere Covid19-aren pandemiak azaleratu dituen auzien artean dagoela onlineranzko joera. Honela, kaleak hustu izanak eragin zuzena izan du kanpo publizitatean.

Errealitate horren baitan, pertsonen ohiturekin lotura estuena izaten asmatu duten markak dira pandemian indartsuen agertu direnak. Egokitzeko gaitasuna dutenak, alegia: erresilienteak. Denbora gutxian erabaki asko hartu behar izan dituzte, eta inflexio puntu horretan, online komunikazioak hozka handi bat jan dio offline komunikazioari, bigarren honen etorkizuna zalantzan jartzeraino.

 

Online eta offline, elkarrekin osagarri

Lehenagotik datorren tendentzia da kale publizitatearen digitalizazioa. Gaur egun bizirik egotearen gakoetako bat, eta etorkizunera jauzi egiteko norabide nagusia. Urte gutxian, pantailek ordezkatu dituzte marka ertain eta handien kaleko publizitate euskarri fisiko gehienak, eta are gehiago arautu eta sistematizatu da bere erabilera. Aldaketak aldaketa, ordea, zer gertatuko da kale publizitatearekin? Iragana da ala badu etorkizunik?

Publizitatea eta marketina egiteko modua errotik aldatu den honetan, eta enpresa eta entitateen irisgarritasunerako, interes komertzialetarako edota salmentetarako premia nabarmen hazi denean, zalantzan jarri da offline marketinak erabiltzaileak erakarri eta emaitza kuantitatibo onak lortzeko duen gaitasuna. Dena den, 2020an bigarren plano batera pasatu izanagatik, 2021an aukera leiho bat zabalik du publizitate teknika honek; kaleak berreskuratzearekin batera, publizitate estrategia oso eta erakargarriak egiteko eta sormenari bide emateko parada eskainiko duelako.

Izan ere, pandemia osteko egoerari begira, offline eta online kanalen uztarketa bilatuko duen tendentzia bati buruz hitz egiten hasiak dira azken hilabeteotan; bi esparruek elkarren beharra izango dutelakoan, eta modu bateratuan kudeatu beharko direlakoan. Bien baturak bakoitzaren indartzea baitakar, eta nola ez, baita markarena ere.

Kalean mugikorraren pantailari begira ibiltzen direnen ehunekoa igotzen ari da, ordea, eta, ondorioz, jendearen arreta pizteko erronka gero eta handiagoa da. Erronka horri erantzuteko, hainbat gomendio jaso ditugu ondorengo lerrotan.

 

Sei gomendio, kalea berrartzeko

Testu laburrak erabili. Denboraren faktorea gero eta erabakigarriagoa da eta, beraz, ulertzeko errazak diren mezu laburrak eta zuzenak erabiltzea oinarrizkoa da, hedatu nahi den mezua hartzaileengana iritsiko dela bermatzeko. Nabarmendutako hitzak gehienez 6 izatea gomendatzen da.

Gaizki-ulertuak saihestu. Iragarki ikusgarri bat plazaratu nahi baduzu, aintzat hartu ahalik eta pertsona gehienek ulertzea komeni dela eta, beraz, ekidin umore ulergaitza, edo mezu konplexuak. Originaltasunak ez du zertan kontrajarria izan ulerterraztasunarekin.

Iragarkia leku bakar batean baino gehiagotan ipini. Kanpainak funtzionatu dezan, komenigarria da ahalik eta lokalizazio gehienetan jartzea, betiere aurrekontuaren arabera, dauden aukerak ondo aztertuta. Kokapena ere hartzailearen arabera aukeratzea garrantzitsua da.

Erabili irudiak. Zabaldu mezua irudi bidez, erakutsi esateko duzun hori. Horretarako, erabili mezua testuinguratzeko baliagarriak diren argazki edo bideo erakargarriak.

Irudimenari lekua egin. Funtsean, sormena da edozein kanpainaren arrakastarako giltza. Eskaini behar duen denbora eta egin merezi duen tokia. Oinarri hau ondo landu ezean, alferrikakoa da gainerako esfortzu guztia.

360 graduko kanpainak. Kokatu iragarkia estrategia orokor baten baitan, eta zehaztu ondo kanpaina zehatz horren hartzailea eta helburua. Behin ere ez landu kale publizitatea ekintza solte moduan.

 

Ate joka daukagun eta pandemia bukatu ahala eskuartean izango dugun erronkari erantzuteko hasiera bide orri bat besterik ez dira arestian jasotakoak. Norberak bere markaren esentzian eustea eta hori balioan jarriz bide berriak urratzea izango da gakoa; sortzaile, ekintzaile eta eraldatzaile izatea.

Markak 2021 urtean: pertsonekin harremantzen diren pertsonak

Urte berria, bizitza berria. Hori dio, behintzat, esaerak. Eta marken kasuan, 2021. urtean bizia hartuko dute, indartu egingo dira, baliorik gizatiarrenak.

Markek balio argi, definitu, erreal eta zintzoetara joko duten urtea izango da aurtengoa. Hitz gutxitan esanda, komunitatean errotutako jasangarritasuna, pertsonen eta planetaren zaintza, feminismoa, ingurumenarekiko errespetua bezalako kontzeptuek inoiz baino protagonismo eta balio handiagoa izango dute marken garapenean. Gure bizitza hobetuko duten sinismen eta ikuspegi berriak dira horiek, komunitatea indartuko dutenak.

 

Gizatasuna 2021. urtean

Pertsona guztiok dugu aldaketarako gaitasuna eta ardura. Denok gara garrantzitsuak. Izan ere, pertsonak dira markak gorpuzten dituztenak: enpresak pertsonak dira, bezeroak ere bai, baita hornitzaileak ere. Horiek guztiek eragin dezakete, eta gizatasuna erdigunean jartzen badugu, aldaketa errazagoa izateaz harago, erreala izango da.

Digitalizazioak elkar konektatzen gaitu, baina paradoxikoki, hartu-eman horretan elkarrengandik urrunago sentitzen gara. Distantzia soziala are handiagoa da pantaila bat tartean dagoenean, izan ere, adibidez, WhatsAppeko testuek ez dute begietara begiratzen. Baina pertsona sozialak garen heinean, besarkadak, irribarreak, musuak behar ditugu; distantzia hori haustea behar dugu, metaforikoki bada ere.

Markek hurbiltasuna ere bilatzen dute. Bezeroarekin -pertsonekin- benetako harremana berreskuratu nahi dute, hots, elkar eragite gizatiarragoa, humanoagoa, bilatzen dute. Markek bihotza dute eta bihotz txiki horietara iritsi nahi dute. Parez pare hitz egin, sentiarazi.

 

Komunikazioak aldatzen lagunduko gaitu

Marka humanizatzeko, komunikazioa ezinbestekoa da. Zer komunikatu, zergatik komunikatu eta nola komunikatu zehaztu beharra dago horretarako. Emozioetara jo behar dugu eta komunitatearen alde gizatiarrenarekin konektatu; horrela, transmititzeaz gain, eraldatzeko eta pertsonen ohituretan aldaketa positiboa sortzeko.

Sentitzen duguna gara; horregatik, emozioen bidez komunikatuko dugu. Tekla egokietan eman behar da emozioekin konektatzeko. Baina emozioak arrazoiarekin orekatu behar ditugu; komunikazioak, emozionala izateaz gain, benetakoa eta koherentea izan behar baitu. Gure koherentzia zenbat eta handiagoa izan, orduan eta hobea izango da pertsonek gure markarekiko izango duten pertzepzioa.

 

Laburbilduz:

– Komunikazioa gizatiarra izango da.

– Komunikazioa aldaketarako tresna izango da.

– Komunikazioak emozioetan eta balioetan jarriko du arreta.

 

Zuzeneko komunikazioa

Youtube, Instagram eta bere zuzenekoak. Zuzeneko ekitaldi digitalak eta postcasting-ak gure komunikazio ekintzetan txertatu behar ditugu. Horrela, distantziatik, espazioa eta denbora partekatzea lortuko dugu.

Esan bezala, digitalizazioak oztopo fisikoak hausteko aukera ematen digu; beraz, opari hau aprobetxatu behar dugu eta, distantzian bada ere, pertsonengandik hurbil egon.

 

Barne-komunikazioa

Bestela esanda: Employee engagement edo employee experience. Lau paretetatik kanpo eraginkortasunez komunikatzeko, garrantzitsua da barne komunikazioa lantzea. Argi eta garbi jakinarazi behar zaie langileei zer egiten ari garen eta zer egingo den enpresan edota entitatean. Langileekiko konpromisoa erakutsi behar da, eta informatuta eta motibatuta eduki behar dira.

 

Horretarako, beharrezkoa da

  • Teknologia:

Teknologia bitartekoa izango da, ez helburua. Ulertu behar da ez garela soilik digitalak; harremantzeko beste bide batzuk ere baloratzen direla. Digitalizazioak komunikazioa hoztea eragin du. Horrekin amaitzeko bide humanoagoak hartzea ezinbestekoa da.

  • Eta markagintza:

Marka garapena argia izango da, sinplea, bereizgarria, zintzoa, erreala… eszenatoki desberdin batera eramango gaituena. Horretarako, markaren eraikuntza ulertzea garrantzitsua da oso.

 

Laburbilduz, enpresa, erakunde, elkarte eta startup guztiek 2021ean markaren eraikuntzan pentsatu behar dute, marka baita enpresaren ukiezin garrantzitsuena, horixe geratzen baita bezeroen buruan produktuak eta zerbitzuak

Nola? da galdera

Orain arte, markagintzan, bi galderei erantzuten genien: zer nahi dugun eta nora jo nahi dugun. Baina, une honetan, galdera aldatu egin da. Zer eta nora galdetu ordez, nola egingo dugun pentsatzen dugu. Hau da, prozesua ondorengoa da: lehendabizi pentsatu egiten dugu, eta, gero, egin. Alta, gehiegi pentsatzeak, aurrera ez egitea ekar diezaguke, gelditzea. Hortaz, neurrian pentsatu behar dugu.

Nork  eta nola egingo dugu?

Pertsonek egiten dituzte markak. Gutako bakoitzak, nahi ala ez nahi, parte garen enpresa edo entitatearen irudi gara. Hortaz, paraleloan doazen bi bide izan beharko dute enpresarena eta berau osatzen duten pertsonena. Enpresek gero eta koherenteagoak izan behar dute, esaten dutena egin; eta, enpresako kideak badira esan eta egingo dutenak, horiek bat egin behar duten enpresaren norabidearekin.

Orain artekoari eten puntua jartzen dio honek. Erabat aldatzen du egoera: orain arte, enpresek kontratuez edo antzinatasunaz hitz egiten zuten; baina, egoera berri honetan, hizketagaiak ere aldatu egiten dira. Gehiago baloratzen dira, beraz, kontziliazioa, ikaskuntza, sormena, lanaren kalitatea…

Orain arte misioa eta bisioa lantzen genituen, eta webgunean edo katalogo korporatiboan biltzen ziren kontzeptuak. Baina manual zaharrak botatzeko garaia heldu da eta nola hori lantzekoa: pertsonak erdigunean jarri eta baloreak lantzekoa.

Pertsonak markekin harremantzen gara: batzuk bankuak gorrotatzen dituzte, futbola miretsi, edo autoak, edo… Eta hori, zergatik? Markek transmtitu egiten digutelako, komunikatu egiten dutela. Eta, ondorioz, guretzat garrantzitsuak diren balio horiek islatzen dituzten markekin identifikatzen gara, bat egiten dugu.

Gure gizartean, egun inoiz baino gehiago, hurbiltasuna, solidaritatea, umiltasuna, laguntasuna… bezalako baloreak dira aintzat hartzen direnak. Horregatik, markek gizartearekin harremandu nahi badute, beren izateko eta komunikatzeko modua aldatu behar dute; egoera berrira egokitu. Beste hitz batzuetan: enpatikoak, gertukoak, gizatiarrak, kolaboratiboak… izan.

Baina hori ez da soilik publizitate kanpainetako leloak eta mezuak aldatzen lortzen. Teoria praktikara emanda lortzen da aldaketa: pentsatzen duguna egiten. Gure baloreak gure ekintzetan islatzen, nor garen, zer garen eta nola egiten dugun modu argi eta gardenean transmitituko dugu.

Elkartasun keinuak, hamaika

Elkartasuna beti da konexiorik onena hala dio egunotan konpainia teknologiko handi baten leloak.  Eta elkartasun keinuak sare sozial, webgune eta plataforma askotatik ari dira zabaltzen birusaren pareko indarrarekin. 

Etxealdian gaudenetik, hamaika izan dira ikusi-entzun edota parte izan garen elkartasun ekintzak. Ospe handiko markek, esaterako, elkartasun-kanpainak egiteko aprobetxatu dute afera. Baina gugandik gertuago daudenek ere beren txikitik ekarpen handiak egin dizute; horietariko asko eta askok, beren jarduna horretara bideratu dute, gainera. 

Mondragon Unibertsitatean, esaterako, Goi Eskola Politeknikoko 3D inprimagailuekin boluntario sare bat egunero-egunero lanean ari da osasungintzako langileentzako materiala sortzen.

Gipuzkoako herri txiki hau txapelduna da ekintza solidarioak gauzatzen eta herrigintza hitza orainaldian deklinatzen. Azken ekimenak hemengaz.eus  du izena. Aretxabaletako denda, ostalari, autonomo eta negozio txikien komunitate honen helburua da krisialdian hankamotz gelditu diren sektoreei eskua luzatzea, aldez-aurreko erosketak antolatzen laguntzen eta bestelako ekintza batzuen bidez. 

Kolaboratzaile dugun Estudios Durero arte grafikoetara eta sormen-industriara bideratutako enpresa da. Beste askori bezala, Covid-19-ak bere eguneroko jardun arrunta etenarazi zuen, baina egoera berriaren aurrean izan zuten erantzuna txalotzekoa da: beren 3D inprimaketa teknologia baliatuta, buru-belarri jarri ziren osasun langileentzat mantalak ekoizten. 

Kirola eta elkartasuna sarritan eskutik helduta doaz. Honen adibide da Mikel Landak buru den Tropel solidarioa ekimena. Laboral Kutxa eta Euskadi Fundazioak babestutako ekimenak elikagaien bankuarentzat 50.000 euro jasotzeko helburua du.

Mondragon Unibertsitatetik eta MONDRAGON Korporaziotik datorkigu azken ekimen hau, Creating For Humanity izenekoa. Ekintza honen bidez gazteentzako mobilizazio masiboa bultzatu nahi dute koronavirusaren krisiari irtenbide eraginkorrak eta azkarrak bilatzeko, geletan ereiten den ekintzaile sena helburu sozial honi bideratuta.   

Adibide batzuk baino ez dira hauek, marka baten atzean pertsonak eta baloreak daudenaren erakusle; eta, zorionez, elkartasuna, enpatia, konpromisoa, zintzotasuna, talde lana, justizia eta norbanakotik begirada jaso eta kolektibotik begiratzeko gaitasuna duten bestelako balioak dituzten markak asko eta asko dira gurean. 

 


 

 

 

COVID-19 eta MARKAK

Zaplazteko bat.

Lau pareten artean gaude gutako bakoitza, gu guztiok. Bakoitza norbere etxean; eta bakoitza, norbere gorputzean.

Baina duela astebete egiten genuena errepikatzen gabiltza lau pareten arten: kanpora begira. Besteek zer egingo, besteek zer sortuko, besteek zer esango. Itxi diguten ateak norbere barrura begiratzeko lehioa zabaldu digun arren; kalera ematen digun lehiotik begira daramagu eguna edo mundura irekitzen gaituen mugikorretik.

Bide berriak bilatu ditugu entretenimendua sortzeko, entretenitzeko. Denbora gelditu denaren sentsazioarekin bukatzeko egotetik gauzak egitera pasa gara:  egin eta egin, egin eta egin.

Captura de pantalla 2020-03-20 a las 16.58.04

Ezin dugu beste aldera begiratu, egoera ukatu nahiko bagenu bezala jokatu, ezer gertatzen ez dela pentsatu. Maratoi baten antzerakoa izango da hau, luze joango da. Egokituko zaigu ez entzunarena egiteagatik ere, egotea; etxea aireratzen dugun moduan, barrura begiratzeko lehioak zabaldu eta gure barrenak aireratzea. Eta helmugara iristean, ez gara berdinak izango. Lau pareten artean egunak eta egunak eman dituzten pertsonak izango gara. Etxetik mugitu gabe bide berriak urratu dituztenak.

Ez gara berdinak izango, ez gu, ezta norbanakook osatzen ditugun markak ere. Honek guztiak, argi dago, marka utziko du gugan.

Gugan eragiten badu, markengan eragingo du

Arraunlarien gisan aritu behar dugu: atzera begira, aurrera egiteko; ez dugu ahaztu behar nondik gatozen, baina honek ere gure izatean isla izango duenez, ezin dugu begiak itxita egin aurrera.

Markek ere bere barrura begiratu beharko dute egunotan. Marketin planak eta estrategiak hautsa hartzen utzi baino, mahai gainean jarri behar ditugu. “Zer nintzen, zer naiz, zer izan nahi dut?” Galderak egiteko garaia heldu da. Galdera horien inguruan  pentsatzekoa.

Captura de pantalla 2020-03-20 a las 16.58.19

Koronabirusa “aldaketa” eskatzen dator, gure ohiturak eta rolak iraultzeko eskatzen. Aldatu beharra daukagu, beraz. Eta, arrapaladan ekin baino, kontzientziaz eta koherentziaz eman behar ditugu hurrengo urratsak.

Momentua da, distantziatik bada ere, elkarrengandik gertu egoteko. Bat egiteko. Gurean, gertuko komunikazioa da oinarri eta helburu. Bezeroa gure bidelaguna delakoan gaude eta bidea hori dela sinetsita ekin diogu bidezidor berri honi ere. Bezeroari irtenbide (des)berdinak, bereizgarriak, eman behar dizkiogulakoan gaude; honela, gizarteari ere konponbideak emateko. Jaso eta eman, eman eta jaso: elkartasuna da hori.

Horretan azti ibili dira hainbat marka: Movistar, Amazon, Zara... Eta handitik ez ezik, txikitik ere eragin daitekeelakoan gaude. Behetik gora.  Berrogeialdi honen lehen egunetako irakaspena izan da hori. Jon Maiak esan bezala: “beharbada pandemia honen aurrean bizitzen ari garen ariketa kolektibo, komunitario, global hontatik ohartzera ailegatu gaitezke mundu honetan kontua ez dela norbera salbatzea, baizik eta soilik denok salbatzen bagara salbatuko dela norbera

Goazen errora. Guztiok egiten dugun galdera hauxe da: “hau noiz arte?“, baina guk egiten duguna ondorengoa da: “bukatzen denean, zer?” Erein eta ernaldu dugun elkartasunari bide ematen jarraitu behar dugula ziur gaude.

Captura de pantalla 2020-03-20 a las 16.58.12

Bitartean, geure buruari galderak egiten jarraitzen dugu:

  • Krisi honen ondoren, bezeroa zelakoa izango da?
  • Bezeroarekin nolako hartu emana izan behar dugu?
  • Bezeroak tratu berdina beharko du?

Eta enpresari dagokionez…

  • Gizatiarragoak izan behar garela konturatuko al gara?
  • Teknologiak garrantzia asko duen arren, giltzarri pertsonak direla argi izango al dugu?
  • Azkarragoak izan behar al dugu? 

Eta pertsonen, gizartearen inguruan…

  • Aldatu beharra al daukagu?
  • Balore berdinei eutsi behar al diegu? 
  • Ona eta txarra binomioak bere horretan jarraituko al du?
  • Gauzak eskala berdinarekin baloratuko al ditugu?
  • Abiadura honetan jarraitu behar al dugu bizitzen?

Hartu denbora galderak egin eta erantzunak bilatzeko.  Sinetsita gaude hau zaplazteko bat izan dela;
zaplazteko bat, esnatzeko.

12345...6