komunikazioa bilaketaren emaitza.

Distantzian bai, baina distante ez

Etxean gelditzera derrigortuta gauden egoera berezi honetan gora egin du sare sozialen erabilpenak, gure sakelakoen datuak urre bihurtzeraino. Sare sozial guztien artean, bada bat aurretik ere aparretan zegoena; eta, egoera honetan, aparrak gora egiten diona: Instagram.

Artista, aktore eta musikari oro etxean direnetik, kultura eskaintzeko eta kontsumitzeko modu berriak sortu dira. Guk geuk, kasu honetan, arreta berezia eskaini diogu Instagramek egunotan zabaldu digun erakusleihoari. 

Izan ere, Instagrama da agertoki nagusia berrogeialdian dauden musikarientzat. Zerrenda amaigabea osa genezake, baita Euskal Herriko musikariei dagokionez ere; besteak beste, Zetak, Zea Mays, La Furia, Xabi Bandini edota Lumi bikoteak eskaini dituzte kontzertuak etxeko egongelatik, mundura zabaltzen dien Instagrameko lehio birtualetik. 

 

Hamaika aukera sortzeko eta entretenitzeko

Egunotan, Bartzelonako hiru publizistek artista anonimoen artelanak jaso eta Instagrameko lehen museo birtuala sortu dute. The Covid Art Museum (CAM, @CovidArtMuseum) da berrogeialdian jaiotzen den munduko lehen museoa eta bertan jasotzen dira konfinamendu-egoerarekin lotutako ilustrazio, argazki, margolan, marrazki, animazio eta bideoak. Tolosa Turismok ere etxetik bertatik herriko txokoak bisitatzeko aukera leiho bat zabaldu du Instagram stories-etan. 

Kultur proposamenetarako ez ezik, Instagramek mezuak zabaltzeko ere balio duela berresteko balio izan digu koronabirusak. Krisia hasi zenean,espaniar estatuko osasungintza departamentuak Dulceida instagramerra kontratatu zuen koronabirusaren inguruko mezuak eta informazioa zabaltzeko. Estatuko osasungintzaren eta herritarren arteko zubi lanak egiteko bide hori erabili du, besteak beste.

Horren urrutira joan gabe, bertako hedabide eta kazetariek ere sare horretara jo dute hainbat eduki sortzeko. Gaztezulo, Berria, Gaztea eta beste hamaika eragile nahiz norbanakok zuzeneko elkarrizketak egiteko ari da erabiltzen Instagram kontua.

Aukera ezinhobea da, gainera, komunitatearen ideiari eusteko, egoera honetan ezinbestekoa baita denak ontzi bereko arraunlariak garela azpimarratzea. Honen adibidea da, zuzenen zuzenean gaiaren errora jo eta konfinamendua hasi bezain pronto aktibatu zen @etxeangeratu Instagrameko profila. 

Komunitatea egiteko beste era bat elkarrekin gauzak egiteko edukiak sortzea da. Etxealdi honetan perretxikoak bezala hazi dira Instagram bidez eskolak ematen dituzten prestatzaile fisiko, sukaldari eta abarrak; zeinak, bide batez,  itxialdi honetan ohitura txarretan ez erortzeko errutinak sorrarazi dizkiguten.

Batzuk aipatzearren:

 

Etxetik munduratzearen albo kalteak

Instagramek eskaintzen dizkigun kultur-proposamen eta aukerak argitara ekarri ditugun arren, ezin ahaztu honen guztiaren itzal luzeaz. Izan ere, musu-truk sorkuntza Instagrametik (edo beste bideetatik) zabaltzearen arrakalez ere asko hitz egin da etxealdi honetan, bereziki kultur-sortzaileek. 

Itxialdi-etxealdi  honek birtualtasunetik ez ezik, balkoitasunetik ere asko du. Balkoietan egin dugu txalo, zarata, dantza, kantuan eta baita bertsotan ere. Balkoitasun honek, hala ere, doakotasuna dakar eta batzuk dagoeneko hasi dira kezkatzen ea joera honek ez duen are gehiago zailduko berez leihatilaren aurretik pasatzeko oso zalea ez den gure gizarte honek, gerora, kulturagatik edo/eta entretenimenduagatik ordaintzea. 

Gaur-gaurkoz atsegiteetatik ez du inork jaten eta txalo birtual zaparradez aparte, kulturgileak (ere) pairatzen ari dira sosen urritasuna berrogeialdi honetan. Honen haritik, krisi honek kulturari ere eragiten diola azaleratzeko, apirilaren 10ean eta 11n, greba kulturala iragarri dute #itzalitanago #itzalitagaude traolen pean. 

Bada zer ikusia, entzuna, gozatua; baina baita zer hausnartua ere.  

 

    

 

COVID-19 eta MARKAK

Zaplazteko bat.

Lau pareten artean gaude gutako bakoitza, gu guztiok. Bakoitza norbere etxean; eta bakoitza, norbere gorputzean.

Baina duela astebete egiten genuena errepikatzen gabiltza lau pareten arten: kanpora begira. Besteek zer egingo, besteek zer sortuko, besteek zer esango. Itxi diguten ateak norbere barrura begiratzeko lehioa zabaldu digun arren; kalera ematen digun lehiotik begira daramagu eguna edo mundura irekitzen gaituen mugikorretik.

Bide berriak bilatu ditugu entretenimendua sortzeko, entretenitzeko. Denbora gelditu denaren sentsazioarekin bukatzeko egotetik gauzak egitera pasa gara:  egin eta egin, egin eta egin.

Captura de pantalla 2020-03-20 a las 16.58.04

Ezin dugu beste aldera begiratu, egoera ukatu nahiko bagenu bezala jokatu, ezer gertatzen ez dela pentsatu. Maratoi baten antzerakoa izango da hau, luze joango da. Egokituko zaigu ez entzunarena egiteagatik ere, egotea; etxea aireratzen dugun moduan, barrura begiratzeko lehioak zabaldu eta gure barrenak aireratzea. Eta helmugara iristean, ez gara berdinak izango. Lau pareten artean egunak eta egunak eman dituzten pertsonak izango gara. Etxetik mugitu gabe bide berriak urratu dituztenak.

Ez gara berdinak izango, ez gu, ezta norbanakook osatzen ditugun markak ere. Honek guztiak, argi dago, marka utziko du gugan.

Gugan eragiten badu, markengan eragingo du

Arraunlarien gisan aritu behar dugu: atzera begira, aurrera egiteko; ez dugu ahaztu behar nondik gatozen, baina honek ere gure izatean isla izango duenez, ezin dugu begiak itxita egin aurrera.

Markek ere bere barrura begiratu beharko dute egunotan. Marketin planak eta estrategiak hautsa hartzen utzi baino, mahai gainean jarri behar ditugu. “Zer nintzen, zer naiz, zer izan nahi dut?” Galderak egiteko garaia heldu da. Galdera horien inguruan  pentsatzekoa.

Captura de pantalla 2020-03-20 a las 16.58.19

Koronabirusa “aldaketa” eskatzen dator, gure ohiturak eta rolak iraultzeko eskatzen. Aldatu beharra daukagu, beraz. Eta, arrapaladan ekin baino, kontzientziaz eta koherentziaz eman behar ditugu hurrengo urratsak.

Momentua da, distantziatik bada ere, elkarrengandik gertu egoteko. Bat egiteko. Gurean, gertuko komunikazioa da oinarri eta helburu. Bezeroa gure bidelaguna delakoan gaude eta bidea hori dela sinetsita ekin diogu bidezidor berri honi ere. Bezeroari irtenbide (des)berdinak, bereizgarriak, eman behar dizkiogulakoan gaude; honela, gizarteari ere konponbideak emateko. Jaso eta eman, eman eta jaso: elkartasuna da hori.

Horretan azti ibili dira hainbat marka: Movistar, Amazon, Zara... Eta handitik ez ezik, txikitik ere eragin daitekeelakoan gaude. Behetik gora.  Berrogeialdi honen lehen egunetako irakaspena izan da hori. Jon Maiak esan bezala: “beharbada pandemia honen aurrean bizitzen ari garen ariketa kolektibo, komunitario, global hontatik ohartzera ailegatu gaitezke mundu honetan kontua ez dela norbera salbatzea, baizik eta soilik denok salbatzen bagara salbatuko dela norbera

Goazen errora. Guztiok egiten dugun galdera hauxe da: “hau noiz arte?“, baina guk egiten duguna ondorengoa da: “bukatzen denean, zer?” Erein eta ernaldu dugun elkartasunari bide ematen jarraitu behar dugula ziur gaude.

Captura de pantalla 2020-03-20 a las 16.58.12

Bitartean, geure buruari galderak egiten jarraitzen dugu:

  • Krisi honen ondoren, bezeroa zelakoa izango da?
  • Bezeroarekin nolako hartu emana izan behar dugu?
  • Bezeroak tratu berdina beharko du?

Eta enpresari dagokionez…

  • Gizatiarragoak izan behar garela konturatuko al gara?
  • Teknologiak garrantzia asko duen arren, giltzarri pertsonak direla argi izango al dugu?
  • Azkarragoak izan behar al dugu? 

Eta pertsonen, gizartearen inguruan…

  • Aldatu beharra al daukagu?
  • Balore berdinei eutsi behar al diegu? 
  • Ona eta txarra binomioak bere horretan jarraituko al du?
  • Gauzak eskala berdinarekin baloratuko al ditugu?
  • Abiadura honetan jarraitu behar al dugu bizitzen?

Hartu denbora galderak egin eta erantzunak bilatzeko.  Sinetsita gaude hau zaplazteko bat izan dela;
zaplazteko bat, esnatzeko.

Zer egin etxeko egonaldia arintzeko?

Gutako bakoitzak dugun konpromiso eta ardura medio, etxetik ari gara lanean AZK-ko kideak. Ez-ohiko egoera honetan gure zerbitzua orain arte moduan emateko prestatu gara azken egunotan AZKn, hortaz, ohiko bideetatik harremanetan jarraituko dugu. Erantzunkizunez jokatuko dugu, eta, distantziatik bada ere, zugandik gertu egongo gara.

Bide hau ere elkarrekin egiteko, etengabe eguneratzean joango gara etxeko egonaldia arintzeko lagungarriak izango zaizkizun irakurgaiak, filmak eta podcast-ak.

liburuak
LIBURUAK

  1. Marketing educativo: Captación y fidelización de alumnos (Carlos Llorente Alonso)
  2. Pensar con tipo: una guía clave para estudiantes, diseñadores, editores y escritores (Ellen Lupton)
  3. Brand off on: El branding del futuro (Andy Stalman)

 

Caaaaaptura de pantalla 2020-03-13 a las 20.14.59PODCASTAK

  1. Barruan gaude, Zuzeu (Spotify): Elkarrizketak protagonisten etxeetan
  2. Marketing Digital, Juan Merodio (Spotify): Marketinaren nondik norakoak, tendentziak…
  3. Ted Talks Daily (Spotify): Bogan dauden gaien inguruko hitzaldiak

 

Caaaptura de pantalla 2020-03-13 a las 20.14.59IKUS-ENTZUNEZKOAK

  1. La trinchera infinita (Netflix): aktoreen lanagatik, irudiagatik, gidoiagatik eta musikagatik
  2. Paquita Salas (Netflix): gidoiagatik eta errealizazioagatik
  3. Euphoria (HBO): postprodukzioagatik

 

Aspertzea zer den ikasi beharko dugun arren, etxean igaro beharreko egunotan modu arin eta dibertigarrian ikasi daiteke gomendi horiek irakurri, ikusi edo entzunda. Zerrenda etengabe eguneratzen joango gara zuen egonaldia xamurtzeko!

Ikasleen praktikaldiak, bi noranzkoko hartu-emana

ikasleak-praktiketan

AZK-n tradizio handia dugu praktiketako ikasleak hartzen, bai Mondragon Unibertsitatetik bai beste formazio zentroetatik ere. Kasu hauetan, bi noranzkoko hartu-emana izaten da, ikasleak ezagutzen baitu enpesa batean eguneroko martxa nolakoa den, benetako proiektuetan parte-hartuz, eta agentziarentzat oso interesgarria izaten da ikasleak ekartzen duen ikuspuntu fresko eta berritzailea. Egun hauetan Anne Baskaran dugu gure artean. 

  

Lehenik eta behin, aurkeztu zure burua.

Anne Baskaran (Gasteiz, 1996) deitzen naiz eta Ikus-entzunezko komunikazio graduaren hirugarren mailan nago. Gaur egun, argazkigintza eta ilustrazioan bete-beterik murgilduta nago.

Ateak ez ixteko Gasteizko Koldo Mitxelena ikastetxean Batxilergo biologikoa egin nuen, nahiz eta Lehen Hezkuntza ikasketak egiteko plana izan. Azkenik, argazkiak egiten erakusten nituen gogoak ikusita, Ikus-entzunezko komunikazioa ikastea erabaki nuen. Hau da, benetan maite nuena egitea aukeratu nuen.

Ordutik, argazkigintza, diseinu eta film laburren hainbat lehiaketa irabazi ditut; haien artean, 2015 Huhezinema jaialdiaren Basque Culinary Center-eko epaimahiaren saria, 2016 Euspot lehiaketaren publikoaren saria ‘Amestu, murgildu, bizi’ spotarekin, Gasteiztarrak arraun the world argazki lehiaketa ‘Lusitaniar herrialdean zehar’ argazki bildumarekin, El Correo Escenas de Álava argazki lehiaketa eta Mondragon Unibertsitateko kirol jertsea lehiaketaren 3.edizioa.

Nolakoa da Ikus-entzuneko Komunikazioa gradua MONDRAGON UNIBERTSITATEAn. Orain metodologia berri bat lantzen da. Zer garrantzi dauka alde praktikoak?

Aurten Mexikon egon naiz ikasten baina joan den urtean, behintzat, graduan geneukan metodologiarekin pozik nengoen. Alde praktikoak niri gustatuko litzaidakeena baino garrantzi gutxiago du. Hala ere, egia da Mondragon Unibertsitateak eskaintzen duena gradu bat dela eta ezinbestez teoria eman behar dela. Ikus-entzunezko produktuaren itxura lantzea egokia da, baina mamia ere.

Zure ustez, ondo egokitzen da lan-merkatuaren eskakizunetara? 

Ikus-entzunezko graduak nahiko orokor lantzen ditu mundu honen barnean dauden arloak, bai onerako eta bai txarrerako. Gradu honi esker orain arte pentsatu ere ez nituen arloak ezagutu ditut, baina egia da beste batzuk sakontzea gustatuko zitzaidala.

Praktikaldian zaude orain, zer nolako lanak burutzen ari zara?

Denetarik, nire saltsan nago! Diseinua ez didate asko irakatsi graduan, baina nire kabuz ikasi ditudan gauzekin nabil lan batzuk egiten: gorra baten diseinua, aldizkari baten portada eta abar. Bestetik, Basque Culinary-n egindako grabaketa batean parte hartu nuen eta asteazken honetan argazki sesio bat daukat. Ezin naiz kexatu.

Zergatik aukeratu zenuen AZK?

Publizitate eta diseinu mundua gehiago ezagutu nahi nuelako eta, nola ez, gure hizkuntza oinarri izanda praktikak burutu nahi nituelako. Beraz, hiru elementu horiek oinarri hartuta, AZK enpresarekin kontaktuan jarri nintzen.

Zer inpresio duzu AZK agentziari buruz?, nolakoa da enpresa barrutik?

AZK agentzia langilea, gertukoa eta serioa da, noiz behinka beharrezkoa den umorea izanik. Langileek transmititzen duten gertutasuna eta gardentasuna da niri gehien gustatu zaidana. Laguntza behar izan dudan momentu oro eskua eskaini didate.

Behin gradua amaituta, zertan gustatuko litzaizuke lana aurkitzea?, edo ikasten jarraituko duzu?

Bizitzak eskaintzen dizkidan ezusteen bila nago, beti proiektu berriak esku artean. Gaur egun lan eremuan bizi dugun egoerari aurpegi ona jarri eta ikasten jarraituko dut. Aukeren artean animazioa eta 3D masterra daukat buruan. Mexikok bi gauza irakatsi dizkit: ikusi eta ikasi. Inoiz ez da berandu ikasten jarraitzeko eta nola ez, sortzeko.

ikasleak-praktiketan

Argazkiak: Jone Martinez.

Gertutik i(ra)kasten

Gure lanari zor, bezeroen marka balioei erreparatzen jardun izan gara sarri. Hauek barneratu eta komunikatutako mezu bakoitzean isla izan dezaten ahaleginduz.

Baina, eta zein da gure marka balio nagusia? Zerk bereizten gaitu? Zein baliorekin lotzen du bezeroak AZK?

Gertutasuna. Hori da AZK.

Baina ezaugarriek, teoriatik haratago joan behar dute ezaugarri izatekotan, jarrera bat izan behar dute.

Ideia horrekin agertu ginen duela hilabete MONDRAGON UNIBERTSITATEko Humanitate eta Hezkuntza Zientzien Aretxabaletako campusean, bezeroarekin elkarlanean, Ikastolen Elkarteko kide diren Ikastola desberdinetako zuzendari eta komunikazio arduradunei, komunikazioari buruzko prestakuntza eskaintzera.

Helburu argi batekin etorri ziren ikastoletako ordezkariak: matrikulaziorako komunikazio kanpaina diseinatzea.

Erronka polita benetan ikastola bakoitzaren errealitatea ezagutu eta oinarrietan sakontzea, azken hori izan baita gure abiapuntua: komunikazio kanpaina bat diseinatzeko oinarrizko pautak elkarbanatzeaz gain, markaren ezaugarriak eta nortasuna aztertzen jardun baikara.

Guztira, 3 saio izango dira (irailaren 28a, urriaren 27a eta azaroaren 30a) eta onena da guk ere ikasteko aukera izan dugula, esperientziak elkarbanatzeak guztientzako onura suposatzen duelako.

Eskerrik asko parte hartzaile guztiei, eta nola ez, Goio, Ainhoa eta Onintzari.